July 4, 2016

Kantoor Personeel

Ria Wright: Kantoorbestuurder en Aanbieder

Nadat ek in 1997 ‘n Egpaar Seminaar by Lewensverryking bygewoon het, het my lewe verander en het Lewensverryking die as van my lewe geword. Met dankbaarheid en toewyding kon ek tot op die einde van my universiteitsliefde se lewe in die huwelik met hom staan. Uit hierdie huwelik het ons saam twee wonderlike seuns, albei nou getroud en leef die lewe soos mens net in jou dertigs kan.

Na Johann se afsterwe het die Here my groot bederf met ‘n wonderlike pasmaat, my Nick. Ons leef nou die lewe in Engels en oor kontinente. Deel van hierdie geskenk is twee lieflike tienerdogters wat my op ‘n daaglikse basis help om te leer hoe om ‘n dogterma te wees. Ons Vader het waarlik ‘n sin vir humor, het ek geleer.

My werkservaring:
Al my kwalifikasies het opleiding as basis, of dit nou onderwys, korporatiewe opleiding, formele sekondêre opleidings instansies of internasionale opleiding platforms is, oor die jare heen, bly ons besig met opleiding. My passie om mense by te staan om heel te word, om meer in hulself te word en die lewe vir hulself te leef tree op alle gebiede van die lewe in. Soveel mense in soveel verskillende fases van hul lewens het my mensekennis gevorm en gegroei, met ‘n honger vir meer kennis oor hoe mense dink en doen.

Een van die grootste rolspelers in my werkslewe is my kwalifikasie deur Kobus Neethling Brein Instituut, as Praktisyn sedert 1993 en ook die laaste twee jaar as NBI Coach, in die laaste fase van registrasie as ICF, Internasionaal geakkrediteerde “Coach”. Die proses om individue by te staan in die proses om meer in HULself te word, met die SELF as die kern.

Bediening:
Ek is lief vir die Here, ek dien Hom in groot afhanklikheid. By Lewensverryking kan ons gerus wees dat die Here in beheer is, altyd. Daarom kan ek in gehoorsaamheid Sy Hand vat, daar waar Hy reeds besig is om te werk, by Hom aansluit, om tot Sy eer en verheerliking mense by te staan en te bedien om ook Sy glorie te ervaar.

Ek is diensbaar, waar ookal die Here my wil gebruik. Soms is dit as aanbieder, soms in my kapasiteit as direkteur en ander tye as die kantoorbestuurder. Die tyd wat oor is, leef ek voluit tot Sy eer.
ria@lewensverryking.co.za


Ina Goosen: Administratiewe Beampte

Die Here is my anker in die lewe.  Ek het beide my ouers versorg tot die dag van hulle afsterwe.  Elke dag kan ek die Here se genade sien en ervaar in my lewe.  Hy het my gelei tot waar ek by die Lewensverryking familie aangesluit het.  Ek het voorheen by die Universiteit van Pretoria gewerk as Departementele Administrateur in die Departement Genetika asook Ondersteuningsbeampte in die Navorsingskantoor.

Ek het ‘n passie vir mense.  As deel van die Lewensverryking span kan ek hierdie passie uitleef om diensbaar te wees aan my medemens en te sien hoe mense hulle potensiaal bereik.

Ek hanteer die navrae, inskrywings en reëlings vir die seminare.
ina@lewensverryking.co.za


Victor Geldenhuys: Rekenkundige Beampte

Victor is Lewensverryking se finansiesman wat alles hanteer wat met finansies te make het: die prosessering van die debietorders, die betaling van rekeninge en salarisse, die gereedkry van al wat ‘n finansiële staat is vir Direksievergaderings. Victor is ook die een om te kontak vir belastingsertifikate.

Victor is ‘n sterk linkerbreiner, en vele is die geleenthede wat mens op jou neus kyk as jy met ‘n breed interpreteerbare opmerking by hom uitkom. Met sy heerlike humorsin en spitsvondigheid sorg hy vir baie ligte oomblikke. Hy’s ‘n entoesiastiese hengelaar en jagter, en daarby ook ‘n papegaaiboer. Somer en winter is hy vroegmore in sy voëlhokke om seker te maak die voëls het kos en alles is reg. Hy en Rene, sy vrou, is ook al baie jare spanlede by Lewensverryking.
victor@lewensverryking.co.za | finansies@lewensverryking.co.za